МАРА - ОСОЈНИЦА

Кажи, мори Маро,
каде го скри
клучот од срцето на Митрета?

Го скрив онаму,
далеку,
зад три ридој
и зад четири реки,
каде мечка не оди,
каде прч не се качува!

Кажи, мори Маро,
зошто го скри
толку далеку
клучот од срцето на Митрета?

Морав да го скријам,
за никој да не го најде,
оти видов дека
око му фрлила
Султана русокоса!

Кажи, мори Маро,
зошто ти е страв
од Султана русокоса,
та го скри толку далеку
клучот од срцето на Митрета?

Султана е девојка,
девојка невина,
а мојата невиност
одамна е изгубена,
оти му ја дадов на Митрета!